Prezident, ijod, ixtisoslashtirilgan, sport, muhandislik, jasorat
maktablari va Al-Beruniy nomidagi xalqaro maktab-internatga ariza topshirish tizimi

Agentlik tizimida bir necha turdagi maktablar mavjud bo'lib, maktab turiga qarab qabul tartibi biroz farq qiladi. Jumladan: Prezident maktablariga umumta'lim maktablarining 4-sinfini, ijod maktablariga 6-sinfini, ixtisoslashtirilgan maktab va maktab-internatlarining aniq fanlar yo'nalishiga 4-sinfini, tabiiy fanlar yo'nalishiga 6-sinfini, Al-Beruniy nomidagi xalqaro maktab-internatiga 8-sinfini tamomlagan o'quvchilarning hujjatlari qabul qilinadi (Prezident maktabi o'quvchilari bundan mustasno). Muhammad al-Xorazmiy nomidagi ixtisoslashtirilgan maktab va uning hududlardagi filiallariga 4-sinfini tamomlagan, Mirzo Ulug'bek va Abu Ali ibn Sino nomidagi ixtisoslashtirilgan maktablar va ularning filiallariga 6-sinfini tamomlagan o'quvchilarning hujjatlari qabul qilinadi. Yangi tashkil etiladigan ixtisoslashtirilgan maktablarda birinchi o'quv yili uchun aniq fanlar yo'nalishiga 5—9-sinflarga, tabiiy fanlar yo'nalishiga 7—9-sinflarga o'quvchilar qabul qilinadi. Bahodir Jalolov nomidagi boksga ixtisoslashtirilgan sport maktabiga 4-sinfni tamomlagan, Oksana Chusovitina nomidagi gimnastikaga ixtisoslashtirilgan sport maktabining 1-sinfiga talabgorlarning hujjatlari qabul qilinadi. Milliy dasturga umumta'lim maktablarining 9-sinfini tamomlagan o'quvchilarning hujjatlari qabul qilinadi (Agentlik tizimidagi maktab o'quvchilari bundan mustasno).

Agentlik tizimidagi barcha maktablarga deyarli bir xil, quyidagi hujjatlarning elektron shakli topshiriladi: o'quvchining oxirgi 2 oyda tushgan fotosurati; o'quvchining tug'ilganlik haqida guvohnomasi va ota-onasi (qonuniy vakili) fuqarolik pasporti ma'lumotlari; bog'lanish uchun telefon raqamlari; hujjat topshirish jarayonida ota-ona (qonuniy vakil) kirish imtihonlari shartlari va talablari bilan tanishganligi to'g'risida onlayn ofertani tasdiqlashi lozim. Maktab turiga qarab qo'shimcha hujjatlar talab qilinishi mumkin: (a) Prezident maktablariga — o'quvchining tegishli o'quv yili natijasiga ko'ra baholar tabelining maktab direktori tomonidan tasdiqlangan nusxasi yoki QR kod bilan tasdiqlangan elektron tabel; (b) Bahodir Jalolov va Oksana Chusovitina nomidagi sport maktablariga — 086-U shakldagi tibbiy ma'lumotnoma, sport razryadi yoki unvonini tasdiqlovchi hujjat va buyruqdan ko'chirma nusxalari, O'zbekiston chempionati va kuboklarida g'olib va sovrindor bo'lganini tasdiqlovchi diplom; (d) Milliy dasturga — fan olimpiadalaridagi yutuqlarni tasdiqlovchi hujjatlar nusxalari (mavjud bo'lsa). O'quvchining bitiruvchi sinf ekanligi integratsiya qilingan elektron tizim orqali avtomatik aniqlanadi. Texnik sabablarga ko'ra aniqlash imkoni bo'lmagan taqdirda nomzod tomonidan baholar tabelining tasdiqlangan nusxasi yoki elektron tabel yuklanishi lozim.

O'quvchilar faqat ta'lim olayotgan maktabining hududidagi (o'z viloyatidagi) Prezident va ixtisoslashtirilgan maktablarga hujjat topshirishi mumkin. 4-sinf bitiruvchisi misolida: birinchidan, o'z hududidagi Prezident maktabiga hujjat topshirib, qo'shimcha (alternativ) ravishda hududdagi ixtisoslashtirilgan maktablardan birini tanlashi mumkin. Ikkinchidan, o'z hududidagi yoki Toshkent shahridagi Muhammad al-Xorazmiy nomidagi ixtisoslashtirilgan maktabga hujjat topshirishi mumkin. Uchinchidan, o'z hududidagi ixtisoslashtirilgan maktablardan biriga hujjat topshirib, qo'shimcha yana bir ixtisoslashtirilgan maktabni tanlashi mumkin. Bundan tashqari, talab etilgan hujjatlar mavjud bo'lsa, Bahodir Jalolov nomidagi boksga ixtisoslashtirilgan sport maktabiga ham hujjat topshirishi mumkin. Shunga ko'ra, o'quvchi 4 marotaba ariza yuborish orqali 6 ta maktabga hujjat topshirishi mumkin. Hujjatlari qabul qilingan taqdirda, har xil kunlarda 6 ta alohida kirish imtihoniga qatnashadi va barcha 6 ta maktabga o'qishga kirish imkoniyatiga ega bo'ladi.

Bu haqda hujjat topshirilgan vaqtda ariza yuboruvchilar tomonidan kiritilgan telefon raqamiga SMS tarzida xabar yuboriladi. Shuningdek, kirish imtihonlaridan kamida 3 kun oldin talabgorning shaxsiy kabinetiga yuborilgan ruxsatnomada ham ushbu ma'lumotlar qayd etiladi. Imtihon ruxsatnomasida imtihon o'tkaziladigan manzil, bino raqami va nomi, guruhi, o'tirish o'rni qayd etilgan bo'ladi.

Ixtisoslashtirilgan maktablar hamda muhandislik maktablariga kirish imtihonlari yo'nalishlar bo'yicha bir bosqichda quyidagi fanlardan o'tkaziladi. Aniq fanlar yo'nalishi bo'yicha: 5—7-sinflar uchun matematika va ingliz tili fanlaridan; 8—11-sinflar uchun algebra, geometriya, fizika va ingliz tili fanlaridan. Tabiiy fanlar yo'nalishi bo'yicha: 7-sinflar uchun tabiiy fan (science) va ingliz tili fanlaridan; 8—11-sinflar uchun biologiya, kimyo, ingliz tili fanlaridan test shaklida o'tkaziladi.